လာမယ့်ကြားဖြတ်ရွေးကောက်ပွဲမှာ မဲပေးပိုင်ခွင့်ရှိသူ နှစ်သန်းကျော်အတွက် မဲရုံနှစ်ထောင် ထားရှိသွားမယ်လို့ ပြည်ထောင်စုရွေးကောက်ပွဲကော်မရှင် အတွင်းရေးမှူး ဦးတင်ထွန်း က ပြောပါတယ်။
ဒီနေ့ နေပြည်တော်မှာ ကျင်းပနေတဲ့ မဲရုံမှူးနဲ့ လက်ထောက်မဲရုံမှူးသင်တန်း ရပ်နားချိန်မှာ အတွင်းရေးမှူး ဦးတင်ထွန်းက ပြောတာဖြစ်ပါတယ်။
၂၀၁၅ ရွေးကောက်ပွဲတုန်းက တချို့မဲရုံတွေမှာ မဲဆန္ဒရှင် ၆ ထောင်နီးပါးအထိ မဲပေးရတာတွေ ရှိတဲ့အတွက် အခက်အခဲတွေ ရှိခဲ့တယ်လို့ သိရပါတယ်။
ဒါ့အပြင် အရင်ရွေးကောက်ပွဲတွေတုန်းက မဲရုံအတွင်းမှာသာ လုံခြုံရေးတစ်ဦးထား ရှိခဲ့တာဖြစ်ပြီး လာမယ့်ကြားဖြတ်ရွေးကောက်ပွဲမှာတော့ မဲရုံအပြင်မှာပါ လုံခြုံရေးထားပေးသွားမယ်လို့ ဦးတင်ထွန်း က ပြောပါတယ်။
ဆန္ဒမဲပုံးတွေကိုလည်း အရင်က လုံခြုံရေးကြိုး နှစ်ကြိုးနဲ့သာ ချည်နှောင်ခဲ့တဲ့အတွက် ပြင်ပမဲတွေ ထပ်ထည့်တယ်ဆိုတဲ့ အငြင်းပွားဖွယ်တွေရှိလာကြောင်း လာမယ့်ကြားဖြတ်ရွေးကောက်ပွဲ မှာ လုံခြုံရေးကြိုး လေးကြိုး အသုံးပြုသွားမယ်လို့လည်း ပြောပါတယ်။
မသန်စွမ်းမဲပေးသူတွေအတွက်လည်း မဲရုံဝင်မယ့်လမ်းကြောင်းကို အနည်းဆုံး အကျယ် ၃ ပေ ထားရှိမှာဖြစ်သလို မဲလက်မှတ်ထုတ်ယူမယ့်နေရာနဲ့ ဆန္ဒပြုရမယ့် နေရာကိုလည်း ၂ ပေကနေ ၂ ပေခွဲအထိသာ အကွာအဝေးထားရှိမယ်လို့ သိရပါတယ်။
လာမယ့် ဧပြီလ ၁ ရက်နေ့မှာ ပြည်သူ့လွှတ်တော် ၉ နေရာ၊ အမျိုးသားလွှတ်တော် ၃နေရာနဲ့၊ တိုင်းဒေသကြီး/ ပြည်နယ် ၇ နေရာ စုစုပေါင်း လစ်လပ်မဲဆန္ဒနယ် ၁၉ နေရာအတွက် ကိုယ်စားလှယ် လောင်း ၉၅ ဦးဝင်ရောက်ယှဉ်ပြိုင်မယ့် ကြားဖြတ်ရွေးကောက်ပွဲ ကျင်းပမှာဖြစ်ပါတယ်။
Photo: Win Ko Ko Latt/ RFA
( ပြည်ထောင်စုရွေးကောက်ပွဲကော်မရှင် အတွင်းရေးမှူး ဦးတင်ထွန်းကို ဇန်နဝါရီလ ၂၅ ရက်နေ့က တွေ့ရစဉ် )
Sources: RFA
No comments:
Post a Comment