ကချင်ပြည်နယ် ဖားကန့်မြို့နယ် နမ့်မဖြစ်ရွာ အလယ်တန်းကျောင်းက သေနတ်နဲ့ ပစ်သတ်ခံရတဲ့ ဆရာ ဦးအောင်ဇင်ထွန်းရဲ့ ဈာပနကို ဆရာ ဆရာမတွေနဲ့ ကျောင်းသားတွေ အပါအဝင် ဒေသခံပြည်သူ ငါးထောင်ဝန်းကျင် ဒီကနေ့ လိုက်ပါပို့ဆောင်ခဲ့ပါတယ်။
ဆရာ ဦးအောင်ဇင်ထွန်းရဲ့ အသုဘကို လိုက်ပါပို့ဆောင်ခဲ့တဲ့ ဖားကန့်ဒေသခံ ဦးတင်လှိုင်က အခုလို ကျောင်းဆရာတစ်ယောက် လုပ်ကြံသတ်ဖြတ်ခံရတဲ့အတွက် ဆရာ၊ ဆရာမတွေရော ဒေသခံတွေပါ စိုးရိမ်ထိတ်လန့်နေကြတယ်လို့ ပြောပါတယ်။
မိုးညှင်းမြို့နယ် ဟိုပင်မြို့ဇာတိ ဆရာ ဦးအောင်ဇင်ထွန်းရဲ့ ဈာပနကို တက်ရောက်လာတဲ့ ဆရာဆရာမတွေက ရင်ဘတ်မှာ အနက်ရောင် ဖဲကြိုးတွေ တပ်ဆင်ပြီး ဝမ်းနည်းကြောင်း ထုတ်ဖော်ခဲ့ကြပါတယ်။
ဆရာ ဦးအောင်ဇင်ထွန်း ကို ဇန်နဝါရီလ ၁၈ ရက်နေ့မှာ ဆိုင်ကယ်စီးသေနတ်သမား ၃ ဦးက နမ့်မဖြစ်ရွာ အလယ်တန်းကျောင်းကနေ တာဝန်ချိန်အတွင်း ခေါ်ဆောင်ပြီး ဦးခေါင်းကို သေနတ်နဲ့ ပစ်သတ်ခဲ့တာဖြစ်ပြီး နမ့်မဖြစ် သုဿာန်မှာ ဒီကနေ့ သဂြိုဟ်တာဖြစ်ပါတယ်။
ဦးအောင်ဇင်ထွန်း ရဲ့ကျန်ရစ်တဲ့ မိသားစုတွေကို အစိုးရက ထောက်ပံ့ဖို့ လွှတ်တော်မှာ အဆိုတင်သွင်းစေလိုကြောင်း၊ ဥပဒေမဲ့ သတ်ဖြတ်တာကို ရှုတ်ချကြောင်း၊ လူသတ်တရားခံကို အမြန်ဆုံးဖော်ထုတ်စေလိုကြောင်း စတဲ့အချက် ၆ ချက်ကို ဒေသခံတွေက တောင်းဆိုခဲ့ကြပါတယ်။
မြန်မာနိုင်ငံလုံးဆိုင်ရာ ဆရာ၊ ဆရာမများအဖွဲ့ချုပ်ကလည်း အသတ်ခံရတဲ့ကိစ္စနဲ့ ပတ်သက်ပြီး အမြန်ဆုံး အမှုမှန်ဖော်ထုတ်နိုင်ဖို့ ရန်ကုန်၊ မန္တလေး စတဲ့မြို့ကြီးတွေမှာ ဆန္ဒပြဖို့ စီစဉ်နေကြပါတယ်။
( ဓါတ်ပုံ - ကချင်ပြည်နယ် ဖားကန့်မြို့နယ် နမ့်မဖြစ်ရွာမှာ သေနတ်နဲ့ ပစ်သတ်ခံရတဲ့ ကျောင်းဆရာ ဦးအောင်ဇင်ထွန်းရဲ့ ဈာပနကို ဇန်နဝါရီလ ၂ဝ ရက်နေ့က တွေ့ရစဉ် )
Sources: RFA
No comments:
Post a Comment