၁၉၈၉ ခုနှစ်၊ ဒီဇင်ဘာလ အတွင်းက ဖြစ်သည်။ ဒေါ်အောင်ဆန်းစုကြည် ပုသိမ်မြို့သို့ ရောက်လာသည်။ ဒေါ်အောင်ဆန်းစုကြည် ပုသိမ်မြို့သို့ ရောက်သောအခါ ထိုစဉ်က ဧရာဝတီတိုင်း၊ တိုင်းမှူး အဖြစ် တာဝန် ထမ်းဆောင်နေသော တိုင်းမှူး ဗိုလ်ချုပ်မြင့်အောင် က အမိန့် အမျိုးမျိုးထုတ်ပြီး ဒေါ်အောင်ဆန်းစုကြည်နှင့် ပြည်သူလူထု မတွေ့နိုင်အောင် လုပ်သည်။
ဒေါ်အောင်ဆန်းစုကြည် ပုသိမ်မြို့ပေါ်က ကားတွေ ငှားမရအောင် နည်းအမျိုးမျိုးဖြင့် ပိတ်ပင်သည်။ ယာဉ်ပိုင်ရှင်တွေကို ခြိမ်းခြောက်သည်။ လူ ငါးယောက်ထက် ပို မစုရဟု အမိန့် ထုတ်သည်။ ယင်းသို့ ဆောင်ရွက်သည့် အတွက် ဒေါ်အောင်ဆန်းစုကြည် တစ်ယောက် သူတည်းခိုရာ နေအိမ်မှ ပုသိမ်မြို့ထဲသို့ ဝင်မရ ၊ ပုသိမ်မြို့ခံများ နှင့်လည်း တွေ့ဆုံခွင့်ရလိမ့်မည် မဟုတ်ဟု တိုင်းမှူး ဗိုလ်ချုပ်မြင့် အောင်က တွက်ဆထားပုံ ရသည်။
သို့သော် နိုဘယ်ငြိမ်းချမ်းရေး ဆုရှင်၊ လူထုခေါင်းဆောင် ဒေါ်အောင်ဆန်းစုကြည်က တိုင်းမှူးဗိုလ်ချုပ် မြင့်အောင် ထင်မှတ်မထားသည့် ပုံစံဖြင့် ပုသိမ်မြို့ထဲ ဝင်လာခဲ့သည်။ ဖြစ်သည့်နည်းဖြင့် ပုသိမ်မြို့ထဲ ဝင်လာသည့် ဒေါ်အောင်ဆန်းစုကြည် ကို မြင်တော့ ပုသိမ်မြို့ခံတွေက အံသြဝမ်းသာကြသည်။
ဒေါ်အောင်ဆန်းစုကြည် သည် ပြည်သူလူထုနှင့် တစ်သားတည်း ရှိသော ခေါင်းဆောင်ကောင်း တစ်ယောက်ဖြစ်သည်။
ဒေါ်အောင်ဆန်းစုကြည် ပုသိမ်မြို့ထဲ ဝင်ပုံက ထူးခြားသည်။ ကားတွေ ငှားမရတော့ စက်ဘီး တစ်စီး ရှာခိုင်းသည်။ ရှာလို့ရသည့် စက်ဘီးကို ကိုယ်တိုင် နင်းပြီး ပုသိမ်မြို့ ထဲဝင်ခဲ့ခြင်းဖြစ်သည်။ ညနေစောင်း လူ အစည်ကားဆုံး အချိန်တွင် ပုသိမ်မြို့တွင်း လမ်းတွေပေါ် မှာ စက်ဘီးစီးနင်းနေသော ဒေါ်အောင်ဆန်းစုကြည် ကို ပုံပါအတိုင်း မြင်တွေ့နိုင်သည်။
ခြိမ်းခြောက်မှုတွေ ရှိနေသော်လည်း ဒေါ်အောင် ဆန်းစုကြည်က ရဲရင့်ရွှင်လန်းစွာဖြင့် ပုသိမ်မြို့က လမ်း တွေပေါ် မှာ တည်ငြိမ်ပျော်ရွှင်စွာ စက်ဘီးစီးနေခဲ့သည်။ ပုသိမ်မြို့သူမြို့သားတွေက ဒေါ်အောင်ဆန်းစုကြည် လွတ်လပ်စွာ စက်ဘီးစီးခွင့် ရရှိအောင် ကူညီစောင့်ရှောက် ပေးခဲ့သည်လားဟု ကျွန်တော်တွေးမိသည်။
(ဒေါက်တာစစ်တင် (GP ))
ဆောင်းပါးရှင် ဒေါက်တာစစ်တင် G-P သည် ၁၉၉ဝ ပြည့်နှစ် ရွေးကောက်ပွဲ၌ အမျိုးသားဒီမိုကရေစီ အဖွဲ့ချုပ်မှ ဝင်ရောက်အရွေးခံခဲ့ပြီး ငပုတောမြို့နယ်၊ လွှတ်တော် ကိုယ်စားလှယ် အဖြစ်ရွေးကောက်ခံခဲ့ရသူ တစ်ဦးဖြစ်သည်။
ငပုတောမြို့နယ်၊ အမျိုးသားဒီမိုကရေစီအဖွဲ့ချုပ် စည်းရုံးရေး တာဝန်ခံအဖြစ် ၁၉၉ဝ ပြည့်နှစ်မှ ၁၉၉၅ ခုနှစ် အထိ ဆောင်ရွက်ခဲ့သူတစ်ဦးလည်းဖြစ်သည်။
ယခုအခါ မိသားစုနှင့်အတူ ပုသိမ်မြို့ တွင် နေထိုင် လျက်ရှိသည်။
ဆောင်းပါးရှင် ဒေါက်တာစစ်တင် ( G-P ) ၏ ကျွန်တော်နှင့် ဒေါ်အောင်ဆန်းစုကြည် ဆောင်းပါးကို Oriental News ဂျာနယ်တွင် ဆက်လက်ဖော်ပြပေး သွားမည်ဖြစ်သည်။
အယ်ဒီတာအဖွဲ့
OrientalNews
No comments:
Post a Comment